مقبوضہ فلسطین میں 2 فلسطینیوں کو گولیاں مار کر شہید کردیا گیا، 3 زخمی

مقبوضہ بیت المقدس: مقبوضہ فلسطین میں دو فلسطینیوں کو گولیاں ما رکر شہید کردیا گیا۔ جبکہ تین زخمی ہوگئے۔ مقبوضہ فلسطینی علاقوں میں صیہونی فوج کی دہشت گردانہ کارروائیاں جاری ہیں۔ بڑھتی ہوئی کشیدگی کے درمیان اسرائیلی فورسز نے مغربی کنارے کے شہر اریحا میں پناہ گزینوں کے کیمپ پر دھاوا بولا اور فائرنگ کرکے ایک فلسطینی کو شہید اور تین کو زخمی کر دیا۔ شہید فلسطینی کی شناخت 20 سالہ سلیمان عیاش کے نام سے ہوئی ہے۔ صیہونی فوج نے دعویٰ کیا ہے کہ وہ علاقے میں آپریشن کر رہی تھی جب دو مشتبہ افراد کو فرار کے دوران گولیاں ماری گئیں۔ اُدھر مقبوضہ یروشلم میں فلسطینی ڈرائیور نے ہجوم پر گاڑی چڑھا دی جس کے نتیجے میں آٹھ افراد زخمی ہو گئے۔ فلسطینی ڈرائیور کو ایک آباد کار نے گولی مار کر شہید کردیا۔ شہید فلسطینی کی شناخت حاتم ابو نجمہ کے نام سے کی گئی ہے۔