امریکی حملہ ہوا تو تل ابیب کو بھی نشانہ بنایا جا سکتا ہے، شمخانی

تہران: ولی امر مسلمین آیت اللہ علی خامنہ ای کے سینئر مشیر علی شمخانی نے امریکا کو کسی بھی فوجی کارروائی کے سنگین نتائج سے خبردار کیا ہے۔ علی شمخانی نے سوشل میڈیا پلیٹ فارم ایکس پر عبرانی زبان میں جاری بیان میں امریکا کو سخت انتباہ جاری کیا۔ انہوں نے کہا کہ کسی بھی قسم کا محدود حملہ ایک فریب ہے اور ہر سطح پر ہونے والی فوجی کارروائی کو اعلانِ جنگ سمجھا جائے گا اور اس کا بھرپور جواب دیا جائے گا۔ انہوں نے کہا کہ ایران کا ردعمل فوری اور غیر معمولی نوعیت کا ہوگا۔ یہ ردعمل حملہ آور، تل ابیب کے مرکز اور حملے کے تمام حامیوں کو نشانہ بنائے گا۔ ایرانی رہنما کے مطابق خطے میں کسی بھی اشتعال انگیزی کے نتائج صرف ایک محاذ تک محدود نہیں رہیں گے۔ شمخانی نے خبردار کیا کہ امریکا اور اس کے اتحادی کسی بھی مہم جوئی سے پہلے اس کے اثرات پر سنجیدگی سے غور کریں۔