امریکا اور علاقائی ممالک نے ایک بھی غلط قدم اٹھایا تو دردناک حملوں کا نشانہ بنایا جائیگا، سپاہ

تہران: سپاہ پاسداران کے خاتم‌الانبیا مرکزی ہیڈکوارٹر نے امریکا اور علاقائی ممالک کو خبردار کرتے ہوئے کہا ہے کہ ایک بھی غلط قدم اٹھایا تو تو دردناک حملوں کا نشانہ بنو گے۔ انہوں نے کہا کہ انٹیلی جنس معلومات کے مطابق، مجرم امریکا، جو صیہونی جھوٹ اور من گھڑت کہانیوں کی بنیاد پر شروع کی گئی جنگ میں اپنی ناکامیوں پر پردہ ڈالنے اور جعلی فتوحات گھڑنے کی کوشش کر رہا ہے، دھوکے اور گھناؤنے ہتھکنڈوں کے ذریعے جنگ جاری رکھنے کے بعد ایک بار پھر ایران مخالف اقدامات شروع کرنے کا فیصلہ کر چکا ہے۔ یہ فیصلہ ایک یورپی ملک میں ہونے والے مشترکہ اجلاس میں کیا گیا، جسے بعض علاقائی ممالک کی ہری جھنڈی حاصل ہے۔
انہوں نے کہا کہ ہماری وارننگ واضح ہے کہ اگر امریکا نے اسلامی جمہوریہ ایران کے خلاف ایک بھی غلط اقدام کیا تو خطے بھر میں اس کے تمام اڈوں اور مفادات کو مسلسل، مؤثر اور دردناک حملوں کا نشانہ بنایا جائے گا۔ اس معاملے میں نہ کوئی حد ہوگی اور نہ کوئی رعایت۔ ایک اور وارننگ بھی واضح ہے کہ اگر علاقائی ممالک دوہرا کھیل جاری رکھتے ہیں اور شیطانِ بزرگ کی جارحیت کے ساتھ کھڑے ہوتے ہیں تو انہیں بھی اس جارحیت میں شریک تصور کیا جائے گا۔ انہیں ایران کی طاقتور مسلح افواج کی جانب سے کسی تحمل یا رعایت کی توقع نہیں رکھنی چاہیے۔