قوم فیصلہ کرلے تو پھر کوئی طاقت اُسے نہیں روک سکتی، عمران خان

لاہور: پاکستان تحریک انصاف کے چیئرمین عمران خان نے کہا ہے کہ اسٹیبلشمنٹ نے طے کرلیا کہ مجھے اقتدار میں نہیں آنے دینا ہے اسی لیے انتخابات کے انعقاد میں رکاوٹیں کھڑی کی جارہی ہیں۔ لاہور میں مینار پاکستان پر بڑے جلسے سے خطاب میں عمران خان نے کہاکہ جلسہ روکنے کیلیے ہمارے 2 ہزار کارکنوں کو گرفتار کیا گیا۔ راستے کنٹینرز لگاکر بند کردئے گئے لیکن عوام کے جنون نے ہر چیز کو شکست دے دی۔ قوم فیصلہ کرلے تو پھر کوئی طاقت اُسے نہیں روک سکتی۔انہوں نے کہاکہ ہماری حکومت کو سازش کے تحت گرا کر جرائم پیشہ افراد کو ملک پر مسلط کیا گیا۔ سازش کے تحت ملک کو دلدل میں پھنسایا گیا ہے۔ پاکستان میں قانون کی حکمرانی نہیں اس لیے یہاں جنگل کا قانون ہے طاقتور چاہیےجو کچھ بھی کرے قانون اُس کے آگے بے بس ہے۔ کئی ممالک میں وقت گزار کر دیکھا کہ عوام ناانصافی کیخلاف کھڑے ہوجاتے ہیں، میں نے اپنی قوم کو ہر ظلم برداشت کرتے دیکھا، جو قوم ظلم کے خلاف کھڑی نہیں ہوتی وہ غلام بن جاتی ہے اور غلام صرف اچھے غلام ہوتے ہیں اور اُن کی زندگی ذلت والی ہوتی ہے۔ چیئرمین پی ٹی آئی نے کہا کہ جب خوف کا بت ٹوٹ جائے تو حقیقی آزادی مل جاتی ہےاور اُن قوموں کو آزادی ملتی ہے جن معاشروں میں قانون کی حکمرانی ہوتی ہے، انصاف کا مطلب امیر اور غریب کیلئے ایک ہی قانون کا ہونا ہے، جو معاشرہ کمزور کو طاقتور کیخلاف انصاف دیتا ہے وہ ترقی کرتا ہے۔ جس ملک میں غریب کے مقابلے میں صرف امیر لوگوں کو انصاف ملے اُسے بنانا ریپبلک کہتے ہیں، ہمارے یہاں بدقسمتی سے غریب آدمی تھانہ کچہری میں ٹھوکریں کھاتا ہے جبکہ یورپ میں تھانہ کچہری کا کوئی تصور نہیں ہے، انہوں نےکہاکہ (ر) جنرل باجوہ کہتا ہے عمران خان خطرناک ہوگیا تھا اسے ہٹانا ضروری تھا۔ آج جو صورتحال ہے وہ کتنی خطرناک ہے کیا اس کا جواب دیں گے؟ ۔عمران خان نے مستقبل کیلئے دس نکاتی پروگرام دیتے ہوئے کہاکہ ہمیں سب سے پہلے کرنٹ اکاؤنٹ خسارے کو ختم کرنا ہوگا اور یہ ڈالر آنے سے ہی ہوگا، اس کے لیے ہمیں صرف قانون کی حکمرانی قائم کرنی ہوگی۔ انہوں نے کہا کہ ’ایک بار ہم نے سمندر پار مقیم پاکستانیوں کا اعتماد بحال کیا تو پھر ملک میں سرمایہ کاری شروع ہوجائے گی پھر ہمیں معمولی قرض کیلئے آئی ایم ایف کے آگے گھٹنے نہیں ٹیکنے پڑیں گے، چین میں بھی اسی طرح ہوا اور پھر آج چین ایک بڑی معاشی طاقت بن کر سامنے آگیا، ہمارے یہاں اوورسیز پاکستانی پلاٹ خریدے تو قبضہ ہوجاتا ہے پھر وہ کیوں یہاں سرمایہ کاری کرے گا۔ چیئرمین پی ٹی آئی نے کہا کہ حکومت آنے کے بعد ہمیں ساڑھے تین سال تک تو چیزیں سمجھ ہی نہیں آئیں تھیں، ہم دوبارہ اقتدار میں آکر ایکسپورٹ بڑھانے کے لیے اقدامات کریں گے، انفارمیشن ٹیکنالوجی کے شعبے میں توجہ دیں گے،ہماری حکومت میں ان دونوں شعبوں کی آمدن بہت زیادہ بڑھ گئی تھی، پھر ہمیں سیاحت کو بھی فروغ دینا ہے اور ہمیں معدنیات پر بھی توجہ دینی ہوگی۔