Raza Musani 
تہران: ایران نے اسرائیل کو خبردار کیا ہے کہ اگر معمولی سی بھی حرکت کی تو تل ابیب اور حیفا کو نابود کردیں گے۔ مسلح افواج کی پريڈ كی تقريب سے خطاب میں ایرانی صدر ابراہیم رئیسی نے کہاکہ انقلاب کے دشمنوں خاص طور پر صیہونی حکومت کو جان لینا چاہئیے کہ ایران کے خلاف کسی بھی حرکت اور غلطی کا دندان شکن جواب دیا جائیگا اور اس کا نتیجہ حیفہ اور تل ابیب کی تباہی کی صورت میں نکلے گا۔ انہوں نے کہاکہ غیر ملکی افواج علاقے کی سلامتی میں کسی بھی قسم کی مددگار نہیں ہیں ۔ امریکی فوجیوں کو پیغام ہے کہ وہ جلد از جلد خطے سے نکل جائیں۔ انہوں نے کہا کہ ایران کی فوج اور سیکیورٹی فورسز ہمیشہ سے علاقے کے عوام کے آرام و سکون اور آسائش و سلامتی کیلئے کوشاں تھی اور رہے گی۔ انہوں نے کہا کہ ایرانی مسلح افواج نے دہشت گردوں کے خلاف مزاحمت کی ہے اور خطے میں سیکیورٹی کو بہتر بنایا ہے جبکہ غیر ملکی افواج صرف علاقائی ریاستوں کے لیے خطرہ ہیں۔
