ایران پر حملہ کیا گیا تو ردِعمل محدود نہیں ہوگا، علی لاریجانی

تہران : ولی امر مسلمین آیت اللہ علی خامنہ ای کے سینئر مشیر علی لاریجانی نے خبردار کیا ہے کہ ایران کے پاس وسیع تر عسکری آپشنز موجود ہیں۔ ان کا کہنا ہے کہ کسی بھی حملے کی صورت میں ایران براہِ راست مقبوضہ علاقوں کے اندر تک کارروائی کر سکتا ہے۔ انہوں نے کہا ہے کہ اگر ایران کی سرزمین پر کسی بھی قسم کا حملہ کیا گیا تو ردِعمل محدود نہیں ہوگا۔ ان کے مطابق ایران کے دفاعی منظر ناموں میں مقبوضہ علاقوں کے اندر گہرائی تک براہِ راست حملے کے آپشنز بھی شامل ہیں۔ انہوں نے واضح کیا کہ دشمن کو یہ غلط فہمی نہیں ہونی چاہیے کہ ایران صرف دفاعی ردِعمل تک خود کو محدود رکھے گا۔ سینئر مشیر کا کہنا تھا کہ ایران کسی بھی جارحیت کا جواب اپنی مرضی کے وقت، مقام اور شدت کے ساتھ دے گا۔ انہوں نے زور دیا کہ ایران کی عسکری صلاحیتیں محض بیانات تک محدود نہیں بلکہ عملی طور پر مکمل طور پر تیار ہیں۔ ایرانی قیادت پہلے ہی خبردار کر چکی ہے کہ امریکا یا اسرائیل کی کسی بھی مہم جوئی کے سنگین علاقائی نتائج برآمد ہو سکتے ہیں۔ بیان میں کہا گیا کہ دشمن کی جانب سے کسی بھی اشتعال انگیزی کا جواب فیصلہ کن اور غیر متوقع ہوگا۔