Raza Musani 
کابل : افغانستان میں طالبان حکومت نے امریکی حملے کی صورت میں ایران کی مکمل حمایت اور مدد کا اعلان کردیا۔ طالبان ترجمان ذبیح اللہ مجاہد نے ایرانی ریڈیو کی پشتو سروس کو انٹرویو میں کہا کہ اگر امریکا نے ایران پر فوجی حملہ کیا اور ایران نے مدد کی درخواست کی تو افغانستان کے عوام اپنی استطاعت کے مطابق تعاون اور یکجہتی کا اظہار کریں گے۔ انہوں نے کہا کہ طالبان قیادت خطے میں کسی نئی جنگ کی خواہاں نہیں اور دونوں ممالک کے درمیان کشیدگی نہیں چاہتی۔ ذبیح اللہ مجاہد نے حالیہ ایران اسرائیل کشیدگی پر بھی تبصرہ کیا اور کہا کہ تہران بارہ روزہ جنگ میں کامیاب رہا۔ ان کا کہنا تھا کہ ایران کے پاس اپنی سرزمین کے دفاع کی مکمل صلاحیت موجود ہے۔ انہوں نے دعویٰ کیا کہ ایران حق پر ہے اور آئندہ بھی کسی جارحیت کا مقابلہ کرنے کی اہلیت رکھتا ہے۔ طالبان ترجمان کے مطابق افغانستان کے عوام مشکل وقت میں ہمسایہ ملک کے ساتھ ہمدردی اور تعاون کے جذبے سے کھڑے ہوں گے۔
