حماس کا فوجی طاقت کا مظاہرہ، صیہونی حلقوں میں کھلبلی

غزہ : حماس کی فوجی شاخ نے اپنے خصوصی دستوں کی ٹریننگ کی ویڈیو جاری کر دی ہے جس کے بعد اسرائیلی خیمے میں ہنگامہ مچ گیا ہے۔ حماس کی فوجی شاخ القسام بریگیڈ نے اپنی فوجی چھاؤنی میں زبردست فوجی مشقیں انجام دیں اور اس کی ویڈیو سوشل میڈیا پر پوسٹ کر دی۔ سوشل میڈیا پر اس ویڈیو کے پوسٹ ہوتے ہی یہ ویڈیو وائرل ہو گئی۔ القسام بریگیڈ نے اپنی سرکاری ویب سائٹ پرفوجی مشقوں کی ویڈیو جاری کیا ہے اور کہا کہ یہ حماس کی ایک فوجی چھاؤنی پر کی گئی فوجی مشقوں کی ویڈیو ہے۔ 2014 میں غزہ پر اسرائیل کے حملے کے دوران ہی غزہ پٹی سے لگی سرحد پر اسرائیلی چھاؤنیوں پر حملے اور غزہ میں گھسنے والے اسرائیلی فوجیوں سے ٹکر لینے کی ذمہ داری القسام بریگیڈ کے اسپیشل دستے پر عائد ہے اور اس نے جنگ کے میدان میں اسرائیلی فوجیوں کو کراری شکست دی اور انہیں غزہ سے پسپائی پر مجبور کر دیا تھا۔