Raza Musani 
غزہ : حماس نے غزہ کی حکومت چھوڑنے اور اختیارات ٹیکنوکریٹ کمیٹی کے سپرد کرنے کا اعلان کردیا۔ ٹیکنوکریٹ کے انتظام سنبھالنے تک حماس بطور نگراں کام کرے گی۔ ترجمان حماس کا کہنا ہے کہ معاہدے کے ضامن ممالک اور امریکی انتظامیہ کی ذمے داری ہے کہ وہ اس معاہدے پر عمل درآمد کرائیں، حماس نے اپنی ذمے داری پوری کر دی ہے۔ بیان کے مطابق تمام سرکاری ملازمین معمول کے مطابق اپنی خدمات جاری رکھیں گے اور قومی کمیٹی کی ذمہ داری میں کام کرنے کے لیے تیار ہیں۔ حماس کا کہنا ہے کہ اختیارات کی منتقلی کے لیے تمام ضروری انتظامی اقدامات مکمل کر لیے گئے ہیں۔ بیان میں کہا گیا ہے کہ یہ اقدام انتظامی انتقالِ اختیار کے عمل کو آگے بڑھانے کے لیے کیا گیا ہے۔ تاہم متعدد مبصرین کے مطابق اس فیصلے کی عملی اہمیت محدود ہے اور اسے زیادہ تر علامتی اقدام قرار دیا جا رہا ہے۔ یہ پیش رفت ایسے وقت میں سامنے آئی ہے جب امریکی صدر ڈونلڈ ٹرمپ کے غزہ سے متعلق مجوزہ منصوبے کے تحت انتظامی ڈھانچے میں تبدیلی کی تجاویز زیرِ بحث ہیں۔
