امریکا میں گن کلچر کے وار جاری، اسپتال میں فائرنگ سے 4 افراد ہلاک

اوکلاہوما: امریکا میں فائرنگ کا ایک اور دہشت انگیز واقعہ پیش آیا ہے۔ اس بار اسپتال نشانہ بنا۔ فائرنگ کے واقعے میں حملہ آور سمیت 4 افراد ہلاک ہو گئے۔فائرنگ کا واقعہ ریاست اوکلاہوما کے شہر ٹولسا میں پیش آیا جہاں رائفل اور ہینڈ گن سے مسلح شخص سینٹ فرانسس اسپتال کے کیمپس میں گھسا اور اندھا دھند گولیاں برسادیں۔ جس کے نتیجے میں 3 افراد ہلاک اور متعدد زخمی ہو گئے۔ حملہ آور نے بھی خود کو گولی مار کر ہلاک کرلیا۔ ڈپٹی پولیس چیف جوناتھن بروکس نے میڈیا کو بتایا کہ حملہ آور کی ابھی تک شناخت نہیں ہوسکی ہے۔ تلسا پولیس ڈیپارٹمنٹ کے کیپٹن رچرڈ میلن برگ نے بتایا کہ واقعہ کی جائے وقوعہ کے ساتھ ساتھ دیگر مقامات پر بھی تحقیقات جاری ہیں۔ جس کی وجہ سے فائرنگ کرنے والے کا نام یا فرد سے متعلق کوئی معلومات جاری نہیں کر رہے ہیں۔ انھوں نے کہا کہ مشتبہ شخص کے پاس ایک لانگ گن اور ایک ہینڈ گن تھی، حملے کے ممکنہ محرک کے بارے میں کوئی معلومات دستیاب نہیں ہو سکی ہیں۔ رواں سال امریکا میں گن کلچر کا یہ 233 واں واقعہ پیش آیا ہے جس میں مسلح شخص نے ہجوم کو گولیوں کا نشانہ بنایا۔