Raza Musani 
لندن : گلوبل صمود فلوٹیلا نے انتیس مارچ سے غزہ کا اسرائیلی محاصرے توڑنے کے لیے اب تک کا سب سے بڑا ہنگامی انسانی مشن شروع کرنے کا اعلان کردیا۔ صمود فلوٹیلا کی جانب سے جاری بیان میں کہا گیاہےکہ امدادی جہاز بارسلونا، اٹلی اور بحیرہ روم کی دیگر بندرگاہوں سے روانہ ہوں گے۔ امدادی مہم میں سو سے زائد ممالک کے تین ہزار افراد حصہ لیں گے۔ منتظمین کے مطابق ایک ہزار سے زائد طبی ماہرین، بشمول ڈاکٹرز اور نرسیں، غزہ میں شدید انسانی بحران کا سامنا کرنے والے فلسطینیوں کی مدد کے لیے رجسٹر ہو چکے ہیں۔ شرکاء کو پچھلے مشنز کی طرح غیر پرتشدد اور تصفیہ کاری کی تربیت دی جائے گی۔ بیان میں اس عزم کا اعادہ کیا ہے کہ یہ فلسطین کی حمایت میں تاریخ کی سب سے بڑی اور منظم انسانی امدادی کارروائی ہو گی۔ منتظمین نے مزید شرکاء اور مالی تعاون کے لیے اپیل کی ہے تاکہ اس سال مہم کامیابی سے چلائی جا سکے۔
