کشیدگی کے عالمی اثرات سنگین ہو سکتے ہیں، قطر کا ٹرمپ کو انتباہ

دوحہ: قطر کے امیر شیخ تمیم بن حمد آل ثانی نے امریکی صدر ڈونلڈ ٹرمپ کو خبردار کیا ہے کہ ایران، امریکا اور اسرائیل کے درمیان جاری فوجی کشیدگی کے عالمی اثرات سنگین ہو سکتے ہیں۔ قطر کے سرکاری خبررساں ادارے کے مطابق دونوں رہنماؤں کے درمیان ٹیلی فون پر گفتگو ہوئی، جس میں خطے میں بڑھتی ہوئی کشیدگی اور اسے کنٹرول کرنے کی کوششوں پر تبادلہ خیال کیا گیا۔ شیخ تمیم نے زور دیا کہ اس تنازع کی شدت بین الاقوامی امن اور سلامتی پر منفی اثر ڈال سکتی ہے۔ اس لیے سفارتی کوششوں کو دوبارہ فعال کرنے کی ضرورت ہے۔ انہوں نے کہا کہ بحران کو سیاسی اور سفارتی راستوں سے محدود کرنا ضروری ہے، اور ضرورت پڑنے پر قطر اپنی خودمختاری، سلامتی اور قومی مفادات کا دفاع کرے گا۔ قطر کی خبر رساں ایجنسی کے مطابق دوحہ اور واشنگٹن نے موجودہ کشیدگی کے حل کے لیے سیاسی اقدامات کی حمایت کرنے پر اتفاق کیا۔ قطر میں مشرقِ وسطیٰ کی سب سے بڑی امریکی فوجی بنیاد واقع ہے اور حالیہ مہینوں میں ایران کی میزائل حملوں کا نشانہ بھی بنا ہے۔