عالمی وبا سے عرب معیشت تباہ،کھربوں ڈالر کا خسارہ

مارکیٹ سرمایہ میں 420ارب ڈالر اور ممبر ان کی جی ڈی پی میں 63ارب ڈالرکی کمی، رکن ممالک کو 220ارب ڈالر کے اضافہ قرضے لینا پڑیں گے، عرب لیگ
71لاکھ ملازمین بیروزگار ہوجائیں گے،رپورٹ،عرب ممالک کی کل معیشت کے 12فی صد کے برابر 223 ارب ڈالر کا نقصان ہوچکا ہے،سرمایہ کار انجمن
جدہ (نیو زڈیسک) کورونا وائرس نے عرب دنیا کی معیشت بھی تباہ کردی،عرب لیگ کی رپورٹ کے مطابق عرب ممالک کا مجموعی خسارہ 12کھر ب ڈالر تک پہنچ جائے گا جبکہ 71لاکھ سے زائد ملازمین بیروزگار ہوجائیں گے،عرب لیگ نے نقصانات کے ازالہ کیلئے بحران فنڈ قائم کرنے پر زور دیا، رپورٹ کے مطابق مارکیٹ سرمایہ میں 420ارب ڈالر، ممبر ممالک کی جی ڈی پی 63ارب ڈالر،220ارب ڈالر کے اضافی قرضے اور 55کروڑ ڈالرکا یومیہ تیل کے ریونیو میں نقصان ہوگا،برآمدات میں 28ارب ڈالر کمی جبکہ ٹیرف ریونیومیں 2ارب ڈالر کا خسارہ ہوگا،رپورٹ میں تجویز دی گئی ہے کہ ممبر ممالک کی مدد کیلئے عرب بحران فنڈ قائم کیا جائے اور رکن ممالک کچھ عرصے کیلئے قرضوں کی باقی اقساط موخر کردیں،ادھر عرب سرمایہ کاروں کی انجمن کے سربراہ حمدی الطباع نے کہا ہے کہ کورونا وائرس کے پھیلاو¿ کی وجہ سے عرب ملکوں کو 223 ارب ڈالر کا نقصان پہنچ چکا ہے اور یہ نقصان عرب دنیا کی کل معیشت کے 12فی صد کے برابر ہے ، اقتصادی جائزوں سے پتہ چلتا ہے کہ رواں سال کے دوران عرب ملکوں کے قرضوں میں 190 ارب ڈالر کا اضافہ ہوگا اور یہ قرضہ 14کھرب ڈالر تک پہنچنے کا اندیشہ ہے۔