Raza Musani 
غزہ :غزہ حکومت نے انکشاف کیا ہے کہ گذشتہ سال اسرائیلی جارحیت کے باعث اہم شعبوں میں براہِ راست نقصانات تینتیس ارب ڈالر سے تجاوز کر گئے ہیں۔ غزہ کے سرکاری میڈیا آفس کے مطابق جنگ سے غزہ میں پندرہ اہم شعبوں کو شدید نقصان پہنچا ہے، جن میں زراعت، مویشی بانی اور ماہی گیری مکمل طور پر تباہ ہو چکے ہیں۔ بیان میں کہا گیا کہ 80 فیصد سے زائد زرعی اراضی متاثر ہوئی جبکہ سبزیوں کی کاشت کا رقبہ انتہائی کم ہو گیا ہے۔ انفراسٹرکچر کے شعبے میں سینکڑوں پانی کے کنویں، ہزاروں کلومیٹر بجلی کی لائنیں اور پانی و سیوریج نیٹ ورکس تباہ کر دیے گئے۔
غزہ حکومت نے بتایا کہ گذشتہ سال ایک سو بارہ ہزار ٹن سے زائد بارودی مواد استعمال کیا گیا، جس سے غزہ کا نوے فیصد انفراسٹرکچر تباہ ہوا۔ صحت اور تعلیم کے شعبے بھی شدید متاثر ہوئے، درجنوں اسپتال ناکارہ، ایمبولینسیں تباہ اور اسکولوں کی بڑی تعداد متاثر ہوئی۔
