Raza Musani 
نیویارک: امریکا کے سابق صدر ڈونلڈ ٹرمپ پر فرد جرم عائد کردی گئی ۔ ٹرمپ نے الزامات تسلیم کرنے سے انکار کردیا۔ فحش فلموں کی اداکارہ اسٹارمی ڈینئلز کو معاملات چھپانے کے لیے رقوم کی ادائیگی پر ٹرمپ کو فوجداری مقدمے کا سامنا ہے۔ مین ہٹن کی گرینڈ جیوری نے معاملے پر ووٹنگ کی جو اس نتیجے پر پہنچی کہ سابق صدر کے خلاف کارروائی کی جانی چاہیے۔ امریکی تاریخ میں یہ پہلا موقع ہوگا کہ کسی بھی موجودہ یا سابق صدر کو کرمنل چارجز کا سامنا کرنا پڑے گا۔ ٹرمپ کو کاروباری فراڈ سے منسلک تیس الزامات کا سامنا ہے۔ سابق صدر کی منگل کو عدالت میں پیش ہونے کی توقع ہے۔ ڈونلڈ ٹرمپ نے الزامات تسلیم کرنے سے انکار کردیا اور کارروائی کو سیاسی دشمنی اور انتخابی عمل میں مداخلت قرار دیا انہوں نے کہاکہ نظام انصاف کو ڈیموکریٹس نے اپنا ہتھیار بنالیا ہے تاکہ سیاسی مخالف کو سزا دی جاسکے۔حلف برداری سے پہلے ہی بائیں بازو کے ڈیموکریٹ ان کے پیچھے پڑ گئے تھے تاکہ امریکا کو عظیم تر بنانے کی تحریک ناکام بنادیں۔
