Raza Musani 
جدہ : سعودی حکومت نے الیکٹرانک اجازت نامہ کے بغیر غیر ملکیوں کے مکہ مکرمہ جانے پر تاحکم ثانی پابندی عائد کردی ہے۔ سعودی محکمہ امن عامہ کے مطابق بغیر پرمٹ داخل ہونے والوں کو سیکیورٹی کنٹرول سینٹرز پر روکا جائے گا۔ بغیر پرمٹ مشاعر مقدسہ میں داخلے پر پابندی ہوگی۔ محکمہ امن عامہ کے ترجمان نے کہا ہے کہ اجازت نامے کے بغیر مقدس شہر میں داخل ہونے کی کوشش کرنے والے غیر ملکیوں کو واپس کردیا جائے گا۔ صرف ان غیر ملکیوں کو مکہ مکرمہ داخلے کی اجازت ہے جن کے پاس عمرہ یا حج اجازت ناموں کے علاوہ متعلقہ اداروں سے جاری ہونے والا اجازت نامہ ہو کہ وہ مکہ مکرمہ میں ملازمت کرتے ہیں یا پھر ان کا اقامہ مکہ مکرمہ محکمہ پاسپورٹ سے جاری شدہ ہے۔
