Raza Musani 
واشنگٹن : امریکا نے ایغور مسلمانوں سے جبری مشقت کے الزام میں 26 چینی کمپنیوں کی درآمدات پر پابندی لگادی۔ امریکی عہدیداران کا الزام ہے کہ چینی حکام نے صوبہ سنکیانگ میں ایغور اور دیگر نسل کے مسلمانوں سے جبری مشقت کے لئے مراکز قائم کررکھے ہیں تاہم چینی حکومت امریکہ کے الزامات کو مسترد کرتی ہے۔ امریکی ڈیپارٹمنٹ آف ہوم لینڈ سیکیورٹی کے مطابق ان چھبیس کمپنیوں کے مراکز صوبہ سنکیانگ سے باہر ہیں مگر ان کا سامان سنکیانگ سے آتا ہے۔ امریکہ نے یہ قدم یوغروں سے کرائے جانے والی جبری مشقت کو روکنے کے لئے بنائے گئے قانون کے تحت اٹھایا ہے ۔ واشنگٹن میں چینی سفارتخانے کے ترجمان نے امریکی قانون کو صوبہ سنکیانگ میں استحکام میں رخنہ پیدا کرنے کےلئے چند امریکی سیاست دانوں کا حربہ قراردیا ہے۔ 2021 میں بنائے گئے قانون کے تحت امریکہ اب تک پینسٹھ چینی کمپنیوں پر پابندی لگا چکا ہے۔
