قحط میں کمی لیکن غزہ کی صورتحال اب بھی سنگین ہے، رپورٹ

غزہ : انٹیگریٹڈ فوڈ سیکیورٹی فیز کلاسیفیکیشن یعنی آئی پی سی نے کہا ہےکہ غزہ میں قحط کی صورتحال وقتی طور پر کچھ حد تک کم ہوئی ہے لیکن مجموعی حالات اب بھی انتہائی سنگین ہیں۔ آئی پی سی نے اپنی نئی رپورٹ میں کہا ہے کہ کشیدگی میں کمی اور انسانی و تجارتی خوراک کی رسائی بہتر ہونے سے قحط کی شدت میں کمی آئی ہے۔ تاہم سولہ اکتوبرسے تیس نومبر کے دوران سولہ لاکھ افراد یعنی ستتر فیصد آبادی شدید غذائی عدم تحفظ کا شکار رہی۔ رپورٹ کے مطابق پانچ لاکھ سے زائد افراد ایمرجنسی کی سطح یعنی آئی پی سی فیز فور اور ایک لاکھ سے زیادہ افراد بدترین صورتحال سے دوچار تھے۔ رپورٹ میں خبردار کیا گیا ہے کہ یہ بہتری عارضی ہے اور صورتحال کسی بھی وقت دوبارہ بگڑ سکتی ہے۔ امدادی رسائی برقرار نہ رہی تو غزہ پٹی میں غذائی بحران ایک بار پھر قحط کی سطح تک پہنچ سکتا ہے۔