Raza Musani 
ماسکو: سفارتکاروں کی بیدخلی سے روس اور جرمنی کےتعلقات مزید کشیدہ ہوگئے ہیں۔ روس نے برلن میں اپنےسفارتی عملے کی بڑے پیمانے پر بیدخلی کے جواب میں 20 سے زائد جرمن سفارت کاروں کو نکالنے کا اعلان کردیا۔ وزارت خارجہ کی ترجمان ماریا زاخارووا نے برلن پر تعلقات خراب کرنے کا الزام لگاتےہوئے کہاکہ 20 سے زائد جرمن سفارت کاروں کو ملک چھوڑنا پڑے گا۔ انہوں نے کہاکہ جرمنی نے تعلقات کو مکمل تباہ کرنے کا سلسلہ جاری رکھا ہے برلن کے معاندانہ اقدامات کے ردعمل میں جرمن سفارت کاروں کو نکالنے کا فیصلہ کیا گیا ہے۔ جرمن وزارت خارجہ کے ایک عہدہ دار نے کہا کہ برلن اور ماسکو گذشتہ چندہفتوں سے رابطے میں تھے اور روسی حکومت کے طیارے کی برلن آمد اس مسئلے سے جڑی ہوئی ہے۔ روس اور جرمنی کے درمیان تعلقات فروری 2022 میں ماسکو کے یوکرین میں اپنی افواج بھیجنے کے بعد سے خراب ہوئے ہیں۔
