سوات میں دھماکا، 12 اہلکاروں سمیت 17 افراد جاں بحق، 70 زخمی

سوات: سیاحتی مقام سوات میں تھانے کے اندر دھماکے سے 12 پولیس اہلکاروں سمیت 17 جاں بحق اور 70 افراد زخمی ہوگئے۔سوات کے علاقے کبل کے محکمہ انسداد دہشتگردی تھانے میں دھماکا گولہ بارود کو آگ لگنے سے ہوا۔آگ لگنے سے عمارت کے بڑے حصے کو نقصان پہنچا اور آگ پھیل گئی۔جاں بحق اہلکاروں میں دو پولیس افسران بھی شامل ہیں۔ زخمیوں میں سے 8 کی حالت تشویشناک بتائی جارہی ہے۔ پولیس نے بتایا کہ تھانے میں دو دھماکے ہوئے جس کے ساتھ ہی بجلی منقطع ہوگئی اور آگ لگ گئی۔ ڈی آئی جی سی ٹی ڈی نے دھماکے کی وجہ لاپرواہی قرار دیتے ہوئے کہا ہے کہ دھماکا بظاہر شارٹ سرکٹ سے ہوا ہے۔ بظاہر خودکش حملے یا دہشت گردی کا واقعہ نہیں لگ رہا۔