یورپی یونین کا شام کے ساتھ تعلقات بحال کرنے کا فیصلہ

برسلز: یورپی یونین نے شام کے ساتھ تعلقات بحال کرنے اور اقتصادی و سیکیورٹی تعاون بڑھانے کا فیصلہ کر لیا ہے۔
خبر رساں ادارے رائٹرز کے مطابق یونین باضابطہ سیاسی رابطے بحال کرے گی اور اعلیٰ سطحی سیاسی مذاکرات کا آغاز گیارہ مئی سے کرے گی۔ منصوبے کے تحت انیس سو اٹھہتر کا تعاون معاہدہ مکمل طور پر بحال کیا جائے گا جبکہ پابندیوں کے نظام میں بھی نرمی لاتے ہوئے اسے نئے حالات کے مطابق ڈھالا جائے گا۔ یورپی یونین اقتصادی تعاون، تجارت اور سرمایہ کاری کے فروغ کے ساتھ ساتھ نجی شعبے کی شمولیت بڑھانے پر بھی کام کرے گی۔ اس کے علاوہ مہاجرین کی محفوظ اور باعزت واپسی، انسداد دہشتگردی، منشیات اسمگلنگ کے خاتمے اور پولیس کی تربیت جیسے شعبوں میں بھی تعاون بڑھایا جائے گا۔