غزہ میں سرگرمیاں ختم کیں تو مسائل بڑھیں گے، ایم ایس ایف

غزہ : جنگ اور آفت زدہ علاقوں میں طبی امداد پہنچانے والی بین الاقوامی تنظیم ڈاکٹرز وِد آؤٹ بارڈرز ایم ایس ایف نےخبردار کیا ہے کہ اگر تنظیم نے غزہ میں اپنی سرگرمیاں ختم کردیں تو صحت کے سنگین مسائل پیدا ہو سکتے ہیں۔ ایم ایس ایف کے ڈائریکٹر فلیپ ریبیرو نے کہا ہے کہ ایم ایس ایف غزہ اور مغربی کنارے میں طبی سہولیات فراہم کرنے والی سب سے بڑی تنظیم ہے۔ اس کا غزہ سے انخلا پہلے سے دباؤ کا شکار طبی خدمات میں بڑا خلا پیدا کر دے گا۔ انہوں نے ایک بیان میں کہا کہ تنظیم جتنا ممکن ہو سکے کام جاری رکھنے کی نیت رکھتی ہے، تاہم حالیہ اسرائیلی اقدامات اس کے کام میں بڑی رکاوٹ ہیں۔ ریبیرو نے بتایا کہ جنوری کے آغاز سے ایم ایس ایف بین الاقوامی عملہ غزہ میں داخل نہیں کر سکی اور اسرائیلی حکام نے داخلے کی اجازت دینے سے انکار کیا ہے۔ طبی سامان کی آمد بھی متاثر ہوئی ہے۔