Raza Musani 
قاہرہ : مصر نے دعویٰ کیا ہے کہ اسے فلسطینیوں کی جبری بے دخلی کے بدلے بڑی مالی پیشکشیں کی گئی تھیں جنہیں ٹھکرادیا گیا۔ مصری وزیر خارجہ بدر عبدالعاطی نے ایک ٹی وی انٹرویو میں بتایا کہ غزہ سے بیدخل فلسطینیوں کو بسانے کیلئے مصر کو تین بڑی مالی آفرز ملی تھیں ان میں ایک پیشکش مصر کے تمام قرضے معاف کرنے اور دیگر بھاری مالی مراعات پر مشتمل تھی۔ بدر عبدالعاطی کے مطابق قاہرہ نے ان تمام آفرز کو دوٹوک انداز میں مسترد کر دیا۔ انہوں نے واضح کیا کہ مصر بین الاقوامی قانون اور اصولی مؤقف پر کوئی سمجھوتہ نہیں کرے گا۔ مصری وزیر خارجہ نے زور دیا کہ مصر بین الاقوامی قانون کی پاسداری کرتا ہے اور نام نہاد جنگل کے قانون کو قبول نہیں کرتا۔ ان کا کہنا تھا کہ اسرائیل کے ساتھ پینتالیس برس سے زائد سفارتی تعلقات کے بعد دونوں ممالک ایک دوسرے کے مؤقف اور طاقت کو اچھی طرح سمجھتے ہیں۔
