خطے کو خونریزی سے تشکیل دینے کی کوششیں جاری ہیں، اردوان

استنبول: ترک صدر رجب طیب اردوان کا کہنا ہے کہ خطے کو خونریزی کے ذریعے ازسرِ نو تشکیل دینے کی کوششیں جاری ہیں۔ ترکیہ ایسے تمام منصوبوں کو ناکام بنانے کے لیے سرگرم عمل ہے۔ انقرہ میں کابینہ اجلاس کے بعد گفتگو میں رجب طیب اردوان نے کہا کہ غزہ، لبنان، سوڈان اور یمن میں جاری جنگوں اور بحرانوں کے ذریعے خطے کی سمت متعین کرنے کی کوششیں کی جا رہی ہیں۔ ترکیہ ایسے تمام خطرات کے مقابلے کے لیے اپنی قومی صلاحیتوں میں مسلسل اضافہ کر رہا ہے۔ اردوان کا کہنا تھا کہ ترکیہ ایک جانب خطے میں امن، استحکام اور سفارتی حل کی حمایت جاری رکھے ہوئے ہے جبکہ دوسری جانب اپنی دفاعی صنعت کو جدید خطوط پر استوار کر رہا ہے تاکہ قومی سلامتی کو ہر سطح پر یقینی بنایا جا سکے۔