Raza Musani 
لاہور: جمعیت علماء پاکستان (نورانی) کی مرکزی مجلس شوریٰ نے آئندہ 3 سال کیلئے نئے عہدیداروں کا انتخاب کر لیا ہے۔ انتخابی نتائج کے مطابق مرکزی انتخابات میں ڈاکٹر ابو الخیر محمد زبیر کو مرکزی صدر، پروفیسر ڈاکٹر جاوید اعوان کو مرکزی سینئر نائب صدر اور سید محمد صفدر شاہ گیلانی کو سیکریٹری جنرل منتخب کر لیا گیا ہے۔ چیئرمین الیکشن کمیٹی السید عقیل انجم قادری کی سربراہی میں تین رکنی کمیٹی ملک ذاکر حسین اعوان ایڈووکیٹ اور محمد ایوب خان ایڈووکیٹ کی نگرانی میں ملک بھر سے جے یو پی کی مرکزی شوریٰ کے 200 سے زائد ارکان نے شرکت کی۔ سید عقیل انجم قادری نے نو منتخب عہدیداروں سے حلف لیا۔ نومنتخب صدر ڈاکٹر ابو الخیر محمد زبیر نے خطاب کرتے ہوئے کہا کہ ملکی حالات سخت خراب ہیں، ملک اور قوم معاشی اور سیاسی مشکلات سے دوچار ہے، وطن عزیز تاریخ کی بدترین صورتحال سے نبرد آزما ہے، اس صورتحال میں مذہبی حلقوں کی ذمہ داری بڑھ جاتی ہے، مذہبی حلقے ملک کو اخلاقی دیوالیہ پن سے بچائیں۔ انہوں نے کہا کہ وہ جے یو پی کی ماضی کی طرح اب بھی خدمت کرتے رہیں گے اور مولانا نورانی کا وحدت کا پیغام نئی نسل تک پہنچائیں گے۔
