مزاحمت کو غیر مسلح کرنا اسے ختم کرنے کا بہانہ ہے، حزب اللہ

بیروت : حزب اللہ کے سیکریٹری جنرل شیخ نعیم قاسم نے خبردار کیا ہے کہ لبنان میں مزاحمت کو غیر مسلح کرنے کی امریکی اور اسرائیلی کوششیں لبنانی قوم کے خاتمے کی تمہید ہیں۔ بیروت میں امام مہدیؑ کی ولادت کے موقع پر منعقدہ تقریب سے خطاب میں شیخ نعیم قاسم نے واشنگٹن اور تل ابیب کی جانب سے بڑھتے ہوئے دباؤ پر کھل کر بات کی۔ انہوں نے کہا کہ امریکا اور اسرائیل لبنانی حکومت پر شدید دباؤ ڈال رہے ہیں کہ حزب اللہ کو غیر مسلح کیا جائے۔ اسرائیلی قبضے کے خاتمے اور مالی امداد کو اسی شرط سے جوڑا جا رہا ہے۔ شیخ نعیم قاسم نے خبردار کیا کہ لبنانی عوام کو ایک واضح انتخاب کا سامنا ہے، یا تو قابضین کا مقابلہ کریں یا پھر ہتھیار ڈال کر خودمختاری اور زمین سے دستبردار ہو جائیں۔ انہوں نےکہا کہ طاقت کو غیر مؤثر بنانے کا بہانہ دراصل مزاحمت کو ختم کرنے اور قوم کو مٹانے کی تیاری ہے۔ شیخ نعیم قاسم نے زور دیا کہ دشمن کے سامنے حتی المقدور ناں کہنا ہوگا، ہتھیار ڈالنے سے انکار کرنا ہوگا اور مزاحمت جاری رکھنی ہوگی۔