ایرانی صدر کی المناک موت کے باوجود دوطرفہ تعلقات کا فروغ جاری رہے گا، سعودی ولی عہد

تہران : سعودی ولی عہد محمد بن سلمان نے ایران کے عبوری صدر محمد مخبر کے ساتھ ٹیلیفونک گفتگو میں صدر آیت اللہ سید ابراہیم رئیسی کی شہادت کی تعزیت پیش کی اور باہمی روابط نیز علاقائی مسائل پر گفتگو کی۔ انھوں نے کہا کہ یہ حادثہ ہمارے لئے بہت دردناک تھا۔ جناب رئیسی اور اسی طرح ایران کے وزیر خارجہ کا بچھڑ جانا، جو ہمارے وزیر خارجہ کے بہت گہرے دوست تھے، ہمارے لئے المناک ہے۔ سعودی عرب کے ولی عہد نے کہا کہ ان دونوں عزیزوں نے جس راستے کا احیاء کا اور باہمی روابط میں فروغ کا جو آغاز کیا ، سعودی عرب اس کو پوری قوت کے ساتھ جاری رکھے گا۔ محمد بن سلمان نے علاقے اور عالم اسلام کے لئے ایران اور سعودی عرب کے روابط میں فروغ کی اہمیت پر زور دیا اور کہا کہ علاقے اور اسلامی دنیا میں تہران اور ریاض کا کردار بنیادی حیثیت رکھتا ہے اور ان کے باہمی روابط کا فروغ علاقے کے لئے درخشاں مستقبل رقم کرے گا۔ انھوں نے اس ٹیلیفونک گفتگو میں ایران اور سعودی عرب کے درمیان اقتصادی روابط کے فروغ کی ضرورت پر بھی زور دیا۔ محمد مخبر نے دوست اور پڑوسی ملکوں کے ساتھ روابط میں توسیع کو شہید آیت اللہ رئیسی کی اسٹریٹجک کامیابیوں میں شمار کیا اور کہا کہ انتھک محنت کرنے والے ایسے صدر مملکت کا فقدان ہمارے لئے بہت سخت ہے لیکن ہماری پالیسی اور اسٹریٹجی میں کوئی تبدیلی نہیں آئے گی اور شہید صدر کے دور میں ایران اور سعودی عرب کے درمیان شروع ہونے والا باہمی اعتماد اور محبت کا جذبہ اسی طرح جاری رہے گا۔