Raza Musani 
وزیراعظم شہباز شریف نے طبیعت ناساز ہونے کے بعد دورہ ایران ملتوی کردیا۔ اب سینیٹر اسحاق ڈار آج ایک وفد کے ہمراہ ایران کے نومنتخب صدر ڈاکٹر مسعود پزشکیان کی تقریب حلف برداری میں شرکت کرینگے۔ اس حوالے سے پاکستان کی وزارت خارجہ نے اپنے جاری بیان میں کہا کہ پاکستانی وفد کا دورہ ایران دو ہمسایہ ممالک کے درمیان اعلیٰ سطح پر تعلقات اور دوطرفہ تعاون کو مضبوط بنانے کے عزم کو ظاہر کرتا ہے۔ واضح رہے کہ ڈاکٹر مسعود پزشکیان 5 جولائی کو 14ویں صدارتی انتخابات کے دوسرے مرحلے میں کامیاب ہوئے۔ وہ انقلاب اسلامی کے بعد 9 ویں صدر کی حیثیت سے ملک کی باگ دوڑ سنبھالیں گے۔ طے شدہ پروگرام کے مطابق صدر کی حلف برداری کی تقریب آج 30 جولائی کو منعقد ہو گی۔
