انروا کے دفتر کی مسماری اقوام متحدہ کے نظام پر کھلا حملہ قرار

جنیوا : اقوام متحدہ کی خصوصی نمائندہ فرانسسکا البانیز نے انروا کے ہیڈکوارٹر کی مسماری کو اقوام متحدہ کے نظام پر کھلا حملہ قرار دے دیا۔ فرانسسکا البانیز کا کہنا ہے کہ انروا کے دفتر کی مسماری اقوام متحدہ اور عالمی قوانین کو منظم طریقے سے نشانہ بنانے کا ثبوت ہے۔ اسرائیلی حکومت کا مسلسل تباہی پھیلانا انتہائی ہولناک ہے اور دنیا کی آنکھوں کے سامنے اقوام متحدہ کو اینٹ بہ اینٹ ختم کیا جا رہا ہے۔ انہوں نے اسرائیلی حکام کی جانب سے نسل کشی پر مبنی بیانات اور اشتعال انگیزی کو انتہائی تشویشناک قرار دیا۔ فرانسسکا البانیز نے خبردار کیا کہ یہ رویہ نسل کشی پر اکسانے کی ایک اور مثال ہے جو اسرائیل میں معمول بنتا جا رہا ہے۔ انہوں نے اقوام متحدہ کے سربراہ انتونیو گوتریس سے مطالبہ کیا کہ جنرل اسمبلی کا خصوصی اجلاس بلایا جائے اور اسرائیل کی رکنیت معطل کرنے کے ساتھ ساتھ پابندیوں اور اسلحہ پابندیوں پر غور کیا جائے۔