قومی اسمبلی میں جنت البقیع کے مزارات کی تعمیر نو کا مطالبہ

اسلام آباد : تحریک انصاف کی منحرف رکن نزہت پٹھان نے قومی اسمبلی میں جنت البقیع میں بی بی فاطمہ (س) ، آئمہ, امہات المومنین اور حضرت حمزہ کے مقدس مزارات کی مسماری کامعاملہ اٹھادیا اور اس کی مذمت کرتے ہوئے ان کی تعمیر نو کا مطالبہ کیا۔ انہوں نے اجلاس سے خطاب میں کہا کہ حالیہ دنوں پاکستانی اراکین پارلیمنٹ کے ساتھ روضہ رسولؐ پر پیش آنے والے واقعے کی مذمت کرتی ہوں۔ یہ شوال کا مہینہ ہے اور 1925 میں 8 شوال کو ایک گروہ نے جنت البقیع میں خاتون جنت ،دختر رسول ؐ حضرت فاطمہ زہرا سلام اللہ علیہا اور ان کے فرزندان امام حسن مجتبیٰؑ ، امام زین العابدینؑ، امام محمد باقرؑ اور امام جعفرصادقؑ کے مقدس مزارات کو بلڈوزر چلا کر مسمار کیا تھا۔ یہ اقدام کلمہ گو مسلمانوں اور آل محمد ؑ سے محبت کرنے والوں کے لئے انتہائی تکلیف دے اقدام تھا، آج بھی رسول اکرم ؐ کے روضے کے سامنے موجود ان کی صاحبزادی کی قبر اجڑی ہوئی اور مسمار حالت میں موجود ہے جہاں زیارت کرنے اور فاتحہ پڑھنے تک کی اجازت نہیں اور سپاہی کھڑے ہیں۔ انہوں نے مزید کہا کہ موجودہ پاکستانی حکومت کے سعودی حکومت کے ساتھ اچھے تعلقات ہیں ، میں پاکستانی کلمہ گو مسلمانوں کی نمائندگی کرتے ہوئےوزیر اعظم پاکستان شہباز شریف صاحب سے گذارش کرتی ہوں کہ وہ سعودی حکومت تک ہمارے جذبات پہنچائیں اور اہل بیت رسولؐ کے مزارات مقدسہ کی تعمیر کا مطالبہ کریں۔