Raza Musani 
نیویارک : اقوام متحدہ کی سلامتی کونسل کے اجلاس میں اسرائیل کی غزہ میں نام نہاد جنگ بندی کی خلاف ورزیوں اور مغربی کنارے میں توسیعی منصوبوں پر شدید تنقید کی گئی۔ نیویارک میں خصوصی اجلاس میں متعدد سفارتکاروں نے غزہ میں انسانی امداد پر پابندیوں اور مقبوضہ مغربی کنارے میں اسرائیلی کنٹرول بڑھانے کی کوششوں کی مذمت کی۔ اجلاس کو ایک دن پہلے اس لیے منعقد کیا گیا تاکہ امریکا کے صدر ڈونلڈ ٹرمپ کی مجوزہ بورڈ آف پیس میٹنگ سے تصادم نہ ہو۔ کئی عرب اور مسلم اکثریتی ممالک نے مطالبہ کیا تھا کہ سلامتی کونسل غزہ کی جنگ بندی اور اسرائیل کے نئے غیرقانونی آبادکاری منصوبے پر فوری غور کرے۔ اقوام متحدہ میں فلسطین کے سفیر ریاض منصور نے عالمی برادری سے مطالبہ کیا کہ وہ الحاق کی غیرقانونی کوششوں کو روکے۔ امریکی مندوب مائیک والٹز نے اجلاس میں کہا کہ جنگ بندی سے جھڑپوں میں کمی آئی ہے اور انسانی امداد کے دائرہ کار میں روز بروز اضافہ ہو رہا ہے۔ اجلاس میں خطے کی صورتحال اور آئندہ اقدامات پر بھی تبادلہ خیال کیا گیا۔
