امریکی اسپیکر تائیوانی صدر سے ملے تو جوابی اقدام کرینگے، چین

بیجنگ : چین نے خبردار کیا ہے کہ اگر امریکی اسپیکر نے تائیوان کے صدر سے ملاقات کی تو وہ جوابی کارروائی کرے گا۔ تائیوان کی صدر سائی انگ وین اگلے ماہ گوئٹے مالا اور بیلیز کے دورے پر جارہی ہیں۔ غیر مصدقہ اطلاع ہے کہ وہ نیویارک یا کیلی فورنیا میں ٹرانزٹ کے دوران امریکی ایوان نمائندگان کے اسپیکر کیون میکارتھی سے ملاقات کریں گی۔ چین تائیوان کو اپنا علاقہ قرار دیتا ہے اور بارہا امریکی حکام کو خبردار کرچکا ہے کہ وہ سائی سے ملاقات نہ کریں۔ بیجنگ میں تائیوان امور ترجمان نے کہاکہ سائی کی امریکا میں ٹرانزٹ ہوائی اڈے یا ہوٹل پر انتظار کیلئے نہیں ہے بلکہ امریکی حکام اور قانون سازوں سے ملاقات کے لیے ہے۔ اگر وہ امریکی اسپیکر میک کارتھی سےرابطہ کرتی ہیں تویہ ایک اور اشتعال انگیزی ہوگی جو ون چائنا اصول کی سنگین خلاف ورزی ہوگی۔ چین کی خودمختاری اور علاقائی سالمیت کو نقصان پہنچائےگی ہم اس کی سختی سے مخالفت کرتے ہیں اور یقینی طور پر پرعزم طریقے سے مقابلہ کرنے کے لیے اقدامات کریں گے۔