غزہ سے اسرائیلی انخلا اور رفح کراسنگ فوری کھولنے پر زور

قاہرہ : مصر کے وزیر خارجہ بدر عبدالعاطی نے غزہ سے اسرائیل کے فوجی انخلا اور رفح کراسنگ فوری کھولنے کا مطالبہ کر دیا ہے۔ مصر کے وزیر خارجہ بدر عبدالعاطی نے قاہرہ میں امریکی نائب وزیر خارجہ کرسٹوفر لینڈاؤ سے ملاقات کے دوران غزہ کی تازہ صورتحال پر گفتگو کی۔ ملاقات میں مصر اور امریکا کے درمیان اسٹریٹجک شراکت داری کو مضبوط بنانے اور سیاسی و معاشی تعلقات کے فروغ پر تبادلہ خیال کیا گیا۔ بدر عبدالعاطی نے امریکا کے صدر ڈونلڈ ٹرمپ کے قائم کردہ “بورڈ آف پیس” میں مصر کی شمولیت کا خیرمقدم کیا۔ انہوں نے غزہ سے متعلق منصوبے کے دوسرے مرحلے پر عملدرآمد، غزہ کے انتظام کے لیے قومی کمیٹی کی حمایت اور جنگ بندی کی نگرانی کے لیے بین الاقوامی استحکام فورس کی فوری تعیناتی پر زور دیا۔ مصر کے وزیر خارجہ نے رفح سرحدی گزرگاہ کو دونوں جانب سے کھولنے اور غزہ سے اسرائیلی افواج کے مکمل انخلا کو جلد بحالی اور تعمیر نو کے لیے ناگزیر قرار دیا۔