Raza Musani 
تہران: ایران نے امریکی پابندیوں سے بچنے اور عالمی بینکاری نظام سے گریز کے لیے چین کے ساتھ بارٹر تجارت کرنے لگا۔ اس خفیہ نظام کے ذریعے ایران نے ادویات، گاڑیوں و مواصلاتی آلات اور فوجی سازوسامان بھی حاصل کیا۔ نیوز ایجنسی رائٹرز کے مطابق ایران نے امریکی پابندیوں سے بچنے اور چین سے اربوں ڈالر کی اشیا خریدنے کے لیے تیل کے بدلے کریڈٹ کا خفیہ نظام قائم کر رکھا ہے۔ اس طریقہ کار میں ایرانی تیل کے بدلے چین سے درآمدات کے لیے کریڈٹ حاصل کیے جاتے ہیں۔ یہ نظام گزشتہ چند برسوں کے دوران امریکی پابندیوں اور اقتصادی دباؤ کے مقابلے میں ایران کے لیے اہم مالی سہارا بن گیا ہے۔
رائٹرز کے مطابق چین کو بھی اس انتظام سے فائدہ پہنچ رہا ہے اور اسے رعایتی قیمت پر ایرانی تیل تک رسائی حاصل رہتی ہے۔ ذرائع کا کہنا ہے کہ چینی بینکوں اور برآمد کنندگان کو بھی بین الاقوامی پابندیوں اور نگرانی سے تحفظ ملتا ہے۔ ذرائع کے مطابق گزشتہ ایک سال کے دوران کم از کم ایک مرتبہ یہی طریقہ ایران کو لاکھوں ڈالر مالیت کے فضائی دفاعی سازوسامان کی فراہمی کے معاہدوں میں بھی استعمال ہوا۔
