سوڈان میں بڑا ریسکیو آپریشن، سینکڑوں سفارتکار و شہری منتقل

خرطوم: سوڈان میں بڑے ریسکیو آپریشن کے ذریعے برطانیہ اور امریکا سمیت کئی ممالک نے اپنے شہری وسفارتکار نکال لئے۔ سعودی عرب نے 90 اور امریکا نے 100 کے قریب سفارت کاروں، اہل خانہ اور شہریوں کو فضائی، بری اور بحری راستوں سے واپس بلالیا۔ فرانس، برطانیہ اور جرمنی سمیت کئی یورپی اور افریقی ممالک نے بھی 200 سے زائد سفارتی عملے اور شہریوں کو نکال لیا ہے۔ خرطوم سے لوگوں کو جبوتی منتقل کیا جارہا ہے۔ دوہری شہریت کے حامل افراد سمیت ہزاروں شہری اب بھی سوڈان میں پھنسے ہوئے ہیں۔ سعودی عرب نے ہفتے کو اپنے 91 اور دوسرے ممالک کے 66 شہری سوڈان سے نکالے۔ اقوام متحدہ کے ترجمان نے بتایا ہے کہ سوڈان میں جاری خانہ جنگی کے باعث 20 ہزار افراد غیر قانونی طور پر سرحد پار کرکے پڑوسی ملک چاڈ پہنچ گئے اور کیمپوں میں پناہ لینے پر مجبور ہوئے۔ مخلتف ممالک اپنے شہریوں کو سوڈان سے نکال رہے ہیں لیکن جنگ میں شدت آنے سے لاکھوں مقامی باشندے اپنے گھروں میں پھنسے ہوئے ہیں۔ بیشتر کے پاس پانی اور خوراک کی کمی ہے۔