Raza Musani 
بہاولپور : بہاولپور میں انسدادِ دہشت گردی عدالت نے بھونگ مندر حملہ کیس میں 22 ملزمان کو پانچ پانچ برس قید اور چار لاکھ روپے فی کس جرمانے کی سزا سنا دی ہے۔ جرمانے کی عدم ادائیگی پر ملزمان کو دیگر دفعات کے تحت مجموعی طور پر 11،11 ماہ مزید قید بھگتنی ہو گی جبکہ عدالت نے 62 ملزمان کو شک کا فائدہ دے کر بری کر دیا ہے۔عدالت نے قرار دیا ہے کہ جرمانے کی رقم متاثر ہونے والے مندر کے اکاؤنٹ میں جمع کروائی جائے گی۔
یہ واقعہ چار اگست 2021 کو ضلع رحیم یار خان کی تحصیل بھونگ میں پیش آیا تھا۔ اس وقت سوشل میڈیا پر اس واقعے کے حوالے سے وائرل ہونے والی ویڈیوز میں دیکھا جا سکتا تھا کہ درجنوں افراد ڈنڈوں، پتھروں اور اینٹوں کے ساتھ مندر کی کھڑکیوں، دروازوں اور وہاں موجود مورتیوں کو توڑ رہے ہیں۔ پولیس کے مطابق 24 جولائی کو ایک 8 سالہ ہندو بچے کے خلاف 295 اے کے تحت مقدمہ درج کیا گیا کیونکہ مقامی مدرسے کی انتظامیہ نے الزام لگایا تھا کہ لائبریری میں ایک بچے نے آ کر پیشاب کیا۔
