Raza Musani 
اسکردو: انجمن امامیہ بلتستان کے صدر آغا باقر الحسینی نے کہا ہے کہ اسکردو میں ایف سی کی تعیناتی کیلئے سارا ڈرامہ رچایا جا رہا ہے۔ اسکردو میں شہید رہبر معظم سید علی خامنہ ای کی یاد میں منعقدہ مجلس ترحیم سے خطاب کرتے ہوئے سید باقر الحسینی نے کہا کہ آرمی پبلک اسکول کو کسی مقامی شخص نے آگ نہیں لگائی، وہاں آگ کے شعلے دیکھ کر لوگ جمع ہوئے۔ ہم املاک کو پہنچنے والے نقصانات پر ہرگز خوش نہیں ہیں۔ آرمی پبلک اسکول ہمارا اپنا اثاثہ ہے، ہمارے نوجوان اسے کیوں آگ لگائیں گے۔ آرمی پبلک اسکول کو پہنچنے والے نقصانات پر آپ سے زیادہ ہمیں افسوس ہے کیونکہ یہ ہمارا اپنا ادارہ ہے۔
انہوں نے کہا کہ امن و امان کی ساری ذمہ داری ہماری نہیں ہے آپ بھی کچھ ذمہ داریاں ادا کریں۔ ہم آپ کا نام عزت و احترام سے لینا چاہتے ہیں، آپ بھی ہمارے جذبات کا خیال رکھیں۔ ہم رہبر کی شہادت پر ویسے بھی زخمی ہیں۔ ہمارے دلوں کو مذید زخمی نہ کیا جائے۔ انہوں نے کہا کہ ہمارے آباؤ اجداد نے ڈوگروں کو بھگایا ہے ہم امن چاہتے ہیں، محاذ آرائی کا راستہ اختیار کرنا نہیں چاہتے ہیں۔ سکیورٹی فورسز کے دفاتر کی سکیورٹی کیلئے ضرورت پڑی تو ہم بھی آئیں گے مگر سکیورٹی کے نام پر عام لوگوں کو تنگ نہ کیا جائے۔ سکیورٹی کے نام پر لوگوں کو تنگ کر کے انہیں حالات کو خراب کرنے پر مجبور کیا جا رہا ہے۔ ہم پاکستان کے محافظ تھے، ہیں اور رہیں گے۔ ان کا کہنا تھا کہ ہم ملک کے محافظ ہیں، ہم ملک کے دشمن نہیں ہیں، وطن پر آنچ آنے نہیں دیں گے۔ نفرتیں مذید نہ بڑھائی جائیں ورنہ یہ نفرتیں آتش فشاں بن جائیں گی۔ ملک کیلئے قربانیاں دی ہیں، آئندہ بھی دیں گے۔ پچھلے تین روز سے احتجاج جاری ہیں کوئی ایک پتہ نہیں گرا۔ ہم امن کی ضمانت دیتے ہیں، کرفیو مزید نہیں ہونا چاہیئے۔ میں پورے بلتستان کے امن کی ضمانت دوں گا۔ کرفیو کے بغیر ہم آرام و سکون سے زندگی بسر کرنا چاہتے ہیں۔
