Ilyas 
جیل حکام نے آیت اللہ زکزاکی کے طبی معائنے پر پابندی عائد کر رکھی ہے، انکی جسمانی صحت کی خرابی کا اندازہ لگانا بھی مشکل ہو گیا،ترجمان اسلامی تحریک
کادونا کے گورنر غیر قانونی گرفتاری کے جوازگڑھ رہے ہیں، بلیک میلنگ اور ریاستی طاقت کا ناجائز استعمال انصاف کے طوفان سے نہیں بچاسکے گا،ابراہیم موسیٰ
کادونا (نیوز ڈیسک) نائیجیریا کی جیل میں قید آیت اللہ زکزاکی کی صحت انتہائی پریشان کن ہوگئی، تحریک اسلامی کے مطابق شیخ زکزاکی سے جیل میں ملاقات کرنے والوں نے ان کی جسمانی حالت کے بارے میں سخت تشویش کا اظہار کیا ہے، جیل حکام نے آیت اللہ زکزاکی کے طبی معائنے پر بھی پابندی عائد کر رکھی ہے لہذا انکی جسمانی صحت کی خرابی کا اندازہ لگانا بھی مشکل ہو گیا ہے، تحریک کے ترجمان ابراہیم موسیٰ نے کادونا کے گورنر ناصروالرفائی کے دعوے کو بے بنیاد قرار دے دیا جس میں انہوں نے کہا تھا کہ شیخ زکزاکی اور ان کے حامیوں کو زاریا میں تیس سال میں کئے گئے جرائم کے کیسز کا سامنا ہے، ابراہیم موسیٰ نے کہاکہ گورنر شیخ زکزاکی کی غیر قانونی گرفتاری کا جواز گڑھنے کیلئے بڑی جدوجہد کررہے ہیں،پہلے انہوں نے کہا تھا کہ شیخ زکزاکی کو ان کی اپنی خواہش پر حراست میں رکھا گیا ہے کسی جرم کی بنیاد پر نہیں،بعد میں انہوں نے کہا کہ شیخ زکزاکی کی اہلیہ گرفتار نہیں وہ اپنے شوہر کا ساتھ دینے کیلئے موجود ہیں ویسے وہ آزاد ہیں جہاں جانا چاہیں جاسکتی ہیں،تووہ اب کن جرائم کا حوالہ دے رہے ہیں،دو دسمبر 2016کو وفاقی عدالت نے شیخ زکزاکی کی گرفتاری اور قید کو غیر قانونی اور غیر آئینی قرار دیا تھا،انہوں نے کہا کہ ہم الرفائی اور ان کے آقا کو یہ بتانا چاہیں گے کہ فیصلے کا دن بہت قریب ہے، انصاف کا بول بالا ہوگا، کسی بھی طرح کی بلیک میلنگ اور ریاستی طاقت کا ناجائز استعمال انہیں انصاف کے طوفان سے نہیں بچاسکے گا۔
