شام پر حملوں سے ایران مضبوط،اسرائیل زیادہ غیر محفوظ ہوا،اسرائیل سیکیورٹی اسٹڈیز سینٹر

اسرائیل نے چند ماہ میں شام پر 300 سے زائد حملے کئے لیکن کوئی نتیجہ نہیں نکلا، ایران بڑی تیزی سے حزب اللہ کی طاقت بڑھا رہا ہے،اسرائیل سیکیورٹی اسٹڈیز سینٹر
حماس اور جہاد اسلامی جیسی فلسطینی تنظیموں کی میزائیلی طاقت میں توسیع بھی صاف دکھائی دے رہی ہے جو اسرائیلی حملوں کی ناکامی ہے،اسرائیلی تجزیہ کار
مقبوضہ بیت المقدس(نیو زڈیسک) اسرائیلی تجزیہ کاروں نے اپنی فضائیہ کے شام پر حملوں کو ناکام قرار دے دیا، صہیونی ماہرین کے مطابق اسرائیلی فضائیہ نے پچھلے کچھ ماہ میں شام پر جو 300 سے زائد حملے کیے ہیں، ان کا کوئی خاص نتیجہ نہیں نکلا ، شام میں ایران کی پوزیشن کمزور ہونے کے بجائے زیادہ مضبوط ہو گئی، جبکہ حزب اللہ کے پاس ایک لاکھ تک میزائیل پہنچ چکے ہیں اور ان سب کا رخ اسرائیل کی جانب ہی ہے،اسرائیل کے قومی سیکیورٹی اسٹڈیز سینٹر کا کہنا ہے کہ ایران بڑی تیزی سے حزب اللہ کی طاقت بڑھا رہا ہے اور حماس اور جہاد اسلامی جیسی فلسطینی تنظیموں کی میزائیلی طاقت میں توسیع بھی صاف دکھائی دے رہی ہے، جب ایران کہتا ہے کہ وہ کسی بھی جنگ میں اسرائیل پر میزائیلوں کی بارش کر دے گا تو اسرائیل کے لیے یہ سمجھنا ضروری ہے کہ میزائیلوں کی بارش صرف ایران سے نہیں بلکہ مختلف سمتوں سے ہوگی، ادھرہوم لینڈ سیکیورٹی کے وزیر نفتالی بینیٹ نے فوجی قیادت کو بہت سخت لہجے میں خط لکھا ہے جس میں کہا گیا ہے کہ ہم نے اب اپنی حکمت عملی بدل دی ہے اور اب ہم شام کے اندرایرانی اہداف پر وسیع حملے کریں گے، اس حکمت عملی کی تبدیلی کا سبب یہ ہے کہ وہ شام میں اب تک حملوں میں اپنے مقررہ اہداف حاصل نہیں کر سکا ہے۔