غزہ پر حملے جاری، 24 گھنٹوں میں شہادتیں 42 تک جاپہنچیں

غزہ : غزہ میں صیہونی فوج نے مسلسل دوسرے دن بھی شدید حملے کئے۔ چوبیس گھنٹوں میں شہید کئے گئے فلسطینیوں کی تعداد بیالیس ہوگئی ہے جس میں سات بچے بھی شامل ہیں۔ صیہونی فوج نے سب سے مہلک حملہ شیخ رضوان پولیس اسٹیشن پر کیا ۔ جس سے عمارت ملبے کا ڈھیر بن گئی۔ ملبے سے چار خواتین اہلکاروں سمیت پندرہ افراد کی لاشیں نکال لی گئیں۔ حملے میں کئی افراد زخمی ہوئے۔ رات گئے اسرائیلی ڈرون نے غزہ شہر کے علاقے السویدی ایک گھر کو نشانہ بنایا ۔ حملے میں تین فلسطینی شہید اور متعدد زخمی ہو گئے۔ جبالیہ میں فوج نے فائرنگ کرکے دو فلسطینیوں کو شہید اور نو کو زخمی کردیا۔ اصداء شہر میں بے گھروں کے خیموں پر حملے میں بھی کئی شہادتیں ہوئیں اور درجنوں خاندانوں کے خیمے متاثر ہوئے۔