بھارت میں ہندو انتہا پسندوں کے مظالم، مسلم ماہی گیروں نے عدالت سے مرنے کی اجازت مانگ لی

نئی دہلی : بھارت میں ہندو انتہا پسندوں کے ظلم وستم کا شکار اور روزگار سے محروم مسلمان ماہی گیروں نے مرنے کے لئے عدالت سے اجازت مانگ لی۔ بھارتی میڈیا کے مطابق بھارتی ریاست کے علاقے پوربندر سے تعلق رکھنے والے 600 مسلمان ماہی گیروں نے گجرات ہائیکورٹ میں قتل رحم کی درخواست دائرکردی۔ مسلمان ماہی گیروں کی تنظیم کی درخواست میں کہا گیا ہے کہ ہندو انتہاپسندوں نے روزگار چھین لیا ہے۔ لائسنس اور اجازت نامے ہونے کے باوجود مسلمانوں کوماہی گیری نہیں کرنے دی جارہی ہے۔ ماہی گیر اوران کے خاندان فاقہ کشی اور بدترین حالات کا شکار ہیں۔ ماہی گیروں کا مزید کہنا تھا کہ ریاستی وزیراعلیٰ اور گورنر تک بھی اپنی شکایت پہنچائی ہے تاہم تمام تر کوششوں کے باوجود کسی نے بھی ان کی فریاد نہیں سنی۔مسلمان ماہی گیروں نے عدالت سے استدعا کی کہ وہ زندہ رہنا نہیں چاہتے اس لئے انہیں مرنے کی اجازت دی جائے۔عدالت سے مرنے کی اجازت طلب کرنے والے مسلمان ماہی گیروں کا تعلق بھارت میں عدم تشدد کی سوچ کے علمبردار مہاتما گاندھی کے آبائی وطن سے ہے۔