جب تک مزاحمت ہے، لبنانی سرزمین کوئی نہیں چھین سکتا، حزب اللہ

بیروت : حزب اللہ کے سربراہ شیخ نعیم قاسم نے موجودہ دور کو امریکی استبداد اور صیہونی جارحیت کے خلاف ایک تاریخی محاذ قرار دیا۔ اسرائیلی جارحیت کے دوران زخمی افراد کے اعزاز میں منعقدہ تقریب سے خطاب میں شیخ نعیم قاسم نے کہا کہ مزاحمتی اور شہری قوتوں نے ایک عظیم ثابت قدمی دکھائی، جس سے جنوبی لبنان میں اسرائیلی فوج کی پیش قدمی رک گئی۔ اور امریکا کا نئے مشرق وسطیٰ کا منصوبہ ناکام ہوگیا۔
انہوں نے کہا کہ اسرائیل جنگ بندی کی بارہا خلاف ورزی کر چکا ہے اس لیے مزاحمت سے ہتھیار چھڑوانے کی کوئی ضمانت موجود نہیں۔ ان کا کہنا تھا کہ جب لبنان اسرائیلی دباؤ کے سائے میں ہو تو ریاستی اجارہ داری نافذ نہیں کی جا سکتی اور ہتھیار ڈالنے کا سوال ہی پیدا نہیں ہوتا۔ انہوں نے واضح کیا کہ جب تک یہ مزاحمت قائم رہے گی یہ سرزمین اس کے لوگوں کے پاس رہے گی۔