Raza Musani 
تہران : ایران کے وزیر خارجہ امیر حسین عداللہیان نے ترک وزیر خارجہ ہاکان فیدان کے ہمراہ مشترکہ پریس کانفرس سے خطاب کرتے ہوئے اسرائیل کی غاصب حکومت کو امت مسلمہ میں تمام فتنہ انگیزیوں کی جڑ قرار دیا اور کہاکہ صیہونی حکومت کی موجودگی کا نتیجہ مسلمانوں میں فتنے کے سوا کچھ نہیں نکلا۔ خطے میں کسی قسم کی جیو پولیٹیکل تبدیلی کو برداشت نہیں کیا جائے گا۔ ایرانی وزیر خارجہ نے کہا انہوں نے ترک ہم منصب سے خطے کے بعض مسائل ، اسلاموفوبیا اور قرآن کریم کی بے حرمتی پر مبنی اقدامات کی روک تھام کیلئے زیادہ موثر اقدامات انجام دینے پر اتفاق کیا ہے۔ حسین امیر عبداللہیان نے شام کے مسائل کی جانب اشارہ کرتے ہوئے کہاکہ ہم نے باہمی گفتگو میں شام کے مسئلے اور ترکی کے تحفظات کا بھی جائزہ لیا ہے۔ ہم ممالک کی خودمختاری پر زور دیتے ہوئے اس بات پر اتفاق رائے رکھتے ہیں کہ دہشت گردی سے متعلق مسائل میں شام اور ترکی کو باہمی گفتگو اور مفاہمت کے ذریعے مناسب راہ حل تلاش کرنا چاہئے۔ ایران بھی دمشق سے دوستانہ تعلقات کے تناظر میں ترکی کے برادران کے تحفظات دور کرنے کی کوششیں جاری رکھے گا۔ ترکیہ کے وزیر خارجہ ہاکان فیدان نے کہاکہ ایران اور ترکیہ کے درمیان تاریخی تعلقات استوار ہیں اور دونوں ممالک مکمل امن سے ایک ساتھ رہ رہے ہیں۔
