شمالی غزہ میں ایک اور وحشیانہ قتل عام، 50 بچوں سمیت 100 فلسطینی شہید

غزہ: صیہونی فوج نے شمالی غزہ میں ایک اور وحشیانہ قتل عام کیا۔ حملے میں پچاس سے زائد بچوں سمیت سو فلسطینی شہید اور درجنوں زخمی ہو گئے۔ صیہونی فوج نے نصیرات اور ملحقہ علاقے میں رات گئے دو رہائشی عمارتوں کو فضائی حملے کا نشانہ بنایا۔ شلائیل اور غندور خاندانوں کی عمارتیں ملبے کا ڈھیر بن گئیں۔ عمارتوں میں زیادہ تر بےگھر متاثرین مقیم تھے۔حملے میں چونتیس فلسطینی شہید ہوئے۔
اسرائیلی محاصرے اور مسلسل بمباری کے دوران علاقے میں شہری دفاع کا عملہ، طبی خدمات یا دیگر امدادی خدمات دستیاب نہیں جس کی وجہ سے شہادتوں میں اضافے کا خدشہ ہے۔ غزہ شہر پر اسرائیلی حملے میں ایک اور فلسطینی صحافی بلال رجب شہید ہوگیا۔
دیر البلاح۔ غزہ سٹی اور الزاویدہ قصبے پر بھی حملے کیے گئے جس میں قیمتی جانیں ضائع ہوئیں۔ خان یونس میں ایک کار پر فضائی حملے میں دس افراد شہید ہوئے۔ اسرائیل نے دعویٰ کیا ہے کہ حماس کے سینئر رہنما غزالدین کساب کو نشانہ بنایا ۔ غزہ میں شہدا کی تعداد 43 ہزار 259 ہوگئی۔ جبکہ ایک لاکھ 18 ہزار 27 افراد زخمی ہیں۔