امریکی شرانگیزی خطے کی موجودہ صورتحال کی اصل وجہ ہے، ولی امر مسلمین

خطے کی موجودہ صورتحال ناقابل قبول ہے، باہر سے خطے میں آنے والی قوتیں علاقائی ممالک کے باہمی تعاون میں توسیع کی خواہاں نہیں
بیرونی قوتوں کا علاقائی معاملات سے کوئی تعلق نہیں، علاقائی ممالک اور اقوام ان کی غنڈہ گردی اورمداخلت کو اب مزید قبول نہیں کریں گی
تہران (نیوز ڈیسک) ولی امر مسلمین آیت اللہ سید علی خامنہ ای نے کہا ہے کہ امریکا اور اس کے اتحادیوں کی جانب سے اٹھائے گئے مجرمانہ اقدامات‘ خطے کی موجودہ صورتحال کی اصل وجہ ہیں، انہوں نے علاقائی ممالک پر زور دیا کہ وہ اس طرح کے اقدامات کو ناکام بنانے کے لئے تعاون کو فروغ دیں، امیر قطر شیخ تمیم بن حمد الثانی سے ملاقات میں ولی امرمسلمین نے خطے کی موجودہ صورتحال کو ناقابل قبول قرار دیا، انہوں نے کہا ہے کہ امریکا اور اس کے اتحادیوں کے جرائم خطے کی خراب صورتحال کی اصل وجہ ہیں، کچھ قوتیں جو دنیا بھر سے اس خطے میں آئیں ہیں وہ علاقائی ممالک کے درمیان باہمی تعاون میں توسیع کی خواہاں نہیں، حالانکہ ان کا اس معاملے سے کوئی تعلق نہیں تاہم علاقائی ممالک اور اقوام ان کی غنڈہ گردی اورمداخلت کو اب مزید قبول نہیں کریں گی، انہوں نے ایران اور قطر کے درمیان اچھے سیاسی تعلقات کی نشاندہی کی اور کہاکہ مشترکہ شعبوں میں ایران قطر تعاون کو مزید وسعت دی جانی چاہئے۔