امریکا شام میں نئی حکومت کو تسلیم کرنے کو بے چین

واشنگٹن : امریکا نے شام میں ھیتہ التحریر الشام کی نئی حکومت کو تسلیم کرنے کا اشارہ دے دیا۔ شام میں بشارالاسد حکومت گرانے کی سازش میں ملوث امریکا نئی حکومت کو جلد سے جلد تسلیم کرنے کیلئے بے چین ہوگیا جبکہ اس نے ابھی تک افغانستان کی حکومت کو تسلیم نہیں کیا ہے۔ امریکی وزیرخارجہ انٹونی بلنکن نے تمام اقوام سے کہا ہے کہ وہ شام میں ایک ایسے سیاسی عمل کے لیے تعاون کریں جس میں سب کو شامل کیا جائے۔ امریکہ بھی وقت کے ساتھ نئی شامی حکومت کو تسلیم کر لے گا۔ تاہم ضروری ہوگا کہ نئی حکومت ضروری معیارات کے مطابق ہو۔ بلنکن نے کہا کہ یہ شامی عوام کا فیصلہ ہوگا شام کا مستقبل کیسا ہونا چاہیے۔ نئی شامی حکومت کو لازما اقلیتوں کے حقوق کا خیال رکھنا ہوگا اور انسانی بنیادوں پر امداد کی ترسیل کے بہاؤ کو رکاوٹ کے بغیر چلنے دینا ہوگا۔ شامی حکومت کو اسرائیل سمیت کسی پڑوسی ملک کیلئے خطرہ نہیں ہونا چاہئے۔