امریکا کو اسلحہ کمی کا سامنا، آٹو میکرز اور مینو فیکچررز سے اسلحہ پیداوار بڑھانے کیلئے رابطہ

واشنگٹن : امریکی اخبار وال اسٹریٹ جنرل کے مطابق پینٹاگون نے ہتھیاروں اور فوجی سازوسامان کی پیداوار بڑھانے کیلئے بڑی آٹو موبائل اور صنعتی کمپنیوں سے رابطے شروع کر دیے ہیں۔ اخبار کی رپورٹ کے مطابق جنرل موٹرز، فورڈ، جی ای ایرو اسپیس اور اوشکوش جیسی کمپنیوں کے ساتھ ابتدائی مذاکرات کیے گئے ہیں تاکہ وہ اپنی فیکٹریوں کی صلاحیت کو دفاعی پیداوار کیلئے استعمال کر سکیں۔ رپورٹ کے مطابق یہ اقدام یوکرین اور ایران سمیت مختلف تنازعات کے باعث امریکی اسلحہ ذخائر میں کمی کے بعد کیا جا رہا ہے۔ پینٹاگون کے ایک اہلکار نے بتایا کہ محکمہ دفاع دفاعی صنعتی بنیاد کو تیزی سے وسعت دینے کے لیے تمام دستیاب تجارتی حل اور ٹیکنالوجیز استعمال کرنے کے لیے پرعزم ہے تاکہ امریکی فوجی فیصلہ کن برتری برقرار رکھ سکیں۔