Raza Musani 
امریکا کا ایران پر پھر حملہ، ایران نے کویت میں امریکی تنصیبات کو نشانہ بنادیا
تہران : امریکا نے ایک بار پھر ایران پر فضائی حملے کئے ہیں جبکہ ایران نے جوابی کارروائی میں کویت میں امریکی ایئربیس کو نشانہ بنادیا۔ امریکی سینٹرل کمانڈ کا کہنا ہے کہ اس نے ایران کے شہر گورُک اور جزیرہ قشم میں ریڈار اور ڈرون تنصیبات کو نشانہ بنایا۔ یہ کارروائی مبینہ ایرانی اقدامات کے جواب میں کی گئی۔ سینٹ کام کا کہنا ہے کہ کارروائی کے دوران ایرانی فضائی دفاعی نظام، ایک زمینی کنٹرول اسٹیشن اور دو یکطرفہ حملہ آور ڈرون تباہ کر دیے گئے۔ ایرانی پاسدارانِ انقلاب نے ردعمل میں کویت میں امریکا کے فضائی اڈے کو نشانہ بنایا ہے۔
ایرانی مہر نیوز ایجنسی کے مطابق پاسدارانِ انقلاب نے ایک امریکی فضائی اڈے کو نشانہ بنایا جہاں سے ایران کے صوبہ ہرمزگان کے جزیرے سِرک پر ٹیلی کمیونیکیشن ٹاور پر حملہ کیا گیا۔ پاسدارانِ انقلاب نے کہا کہ اس کی ایرو اسپیس فورس نے اس اڈے کو نشانہ بنایا اور تباہ کر دیا جہاں سے امریکی افواج نے مواصلاتی سہولت کے خلاف آپریشن شروع کیا تھا۔ پاسدارانِ انقلاب نے کہا کہ یہ حملہ امریکی حملے کی اطلاع کے چند گھنٹے بعد کیا گیا اور پہلے سے طے شدہ اہداف کو کامیابی سے نشانہ بنایا گیا ہے۔
