گرین لینڈ کے تنازع پر امریکا اور یورپ آمنے سامنے

واشنگٹن : گرین لینڈ پر کنٹرول حاصل کرنے کی امریکی کوششوں نے مضبوط اتحادیوں کے درمیان دراڑ ڈال دی۔ فرانس کے صدر ایمانوئل میکرون نے کہا کہ امریکا کی نئے محصولات کی دھمکیاں ناقابل قبول ہیں۔ انہوں نے یورپی یونین پر امریکا کے خلاف اپنے مضبوط ترین تجارتی ہتھیار ٹریڈ بزوکا کو استعمال کرنے پر زور دیا۔
امریکی صدر ٹرمپ فرانسیسی ہم منصب کے غزہ بورڈ آف پیس میں شمولیت سے انکار اور گرین لینڈ پر سخت موقف پر برہم ہوگئے اور میکرون کو بہت جلد اقتدار سے باہر کرنے کی دھمکی دے ڈالی۔ ٹرمپ نے کہا کہ کوئی بھی گرین لینڈ کی حفاظت نہیں کر سکتا۔ یورپی رہنما ان کی جزیرہ خریدنے کی کوششوں کے خلاف مزاحمت نہیں کرسکیں گے۔ برطانوی وزیراعظم سر کیئر اسٹارمر نے کہا کہ اتحادی ممالک کے درمیان اختلافات کو ٹیرفس کے ذریعے حل کرنا درست طریقہ نہیں۔ جبکہ یورپی یونین کی صدر ارسلا ونڈر لین نے کہا کہ موقع سے فائدہ اٹھانے اور ایک نیا آزاد یورپ بنانے کا وقت آگیاہے۔
امریکا سے تنازع پر یورپ میں بے چینی پھیل گئی ہے جبکہ مالیاتی منڈیوں میں بھی ہلچل دیکھی گئی ہے۔ فرانسیسی صدر ایمانوئل میکرون نے اس معاملے پر بیشتر یورپی رہنماؤں کے مقابلے میں سخت مؤقف اختیار کیا ہے اور یورپی یونین پر زور دیا ہے کہ وہ امریکا کے خلاف اپنے مضبوط ترین تجارتی اقدامات کو فعال کرے۔