Raza Musani 
دمشق: اسلامی جمہوریہ ایران اور عرب جمہوریہ شام نے ایران کے صدث آیت اللہ سید ابراہیم رئیسی کے شام کے دو روزہ سرکاری دورے کے اختتام پر مشترکہ اعلامیہ جاری کردیا۔ اعلامیہ میں کہا گیا ہے کہ دونوں صدور نے اہم موضوعات پر بات چیت کی جس میں دونوں ممالک کے درمیان برادرانہ اور اسٹریٹجک تعلقات کی بنیاد پر دوطرفہ تعلقات کو فروغ دینے اور مضبوط بنانے کے طریقوں سمیت خطے اور عالمی سطح پر رونما ہونے والی تازہ ترین پیش رفت پر تبادلہ خیال کیا گیا۔ فریقین نے اقوام متحدہ کے بین الاقوامی قوانین اور اصولوں کے مطابق، دونوں ممالک کی قومی خودمختاری، آزادی اور علاقائی سالمیت کا احترام کرنے کی ضرورت پر زور دیا۔ ایرانی اور شامی صدور نے سیاسی، اقتصادی، قونصلر اور تعاون کے دیگر تمام شعبوں کے ساتھ ساتھ، دونوں ممالک کے درمیان اعلیٰ سطحی وفود کے تبادلوں کے تسلسل کے ذریعے دو طرفہ تعلقات کو مضبوط بنانے کی اہمیت پر زور دیا۔ اعلامیہ کے مطابق سید ابراہیم رئیسی اور ان کے شامی ہم منصب بشار الاسد نے، دونوں ممالک کے درمیان اقتصادی اور تجارتی تعلقات کو فروغ دینے کیلئے کسی بھی اقدام اٹھانے کیلئے اپنی تیاری اور آمادگی کا اظہار کیا اور شامی عرب جمہوریہ کی تعمیر نو کے میدان میں تعاون کو جاری رکھنے پر بھی زور دیا۔ ایران اور شام کے صدور نے دہشت گردی اور انتہا پسندی کے خلاف جنگ میں مشترکہ تعاون پر اطمینان کا اظہار کرتے ہوئے تمام دہشت گرد گروہوں کو صفحۂ ہستی سے مٹانے کیلئے مشترکہ تعاون جاری رکھنے پر زور بھی دیا۔
